Wezareta Neftê ya Iraqê, derbarê hinardekirina neftê di rêya fîşxabûr-banyas û berfirehkirina xetên hinardekirinê de, daxuyaniyek belav kir.
Di daxuyaniyê de hatiye diyarkirin ku Cîgirê Wezîrê Neftê yê ji bo Karên Veberhênanê Nesîr Ezîz, di çarçoveya plansaziya wezaretê ya ji bo pêşxistina çavkaniyên binerd, bihêzkirin û piralîkirina xetên hinardekirinê de, serokatiya civîneke berfireh kiriye; ev civîn taybet bûye bi gotûbêjkirina projeyeke nû ya çêkirina tora boriyên veguhastin û hinardekirina nefta xam.
Di civînê de Nesîr Ezîz behsa giringiya xetên nû yên ji bo piştgirî û bihêzkirina hinardekirina nefta Iraqê, dabînkirina deryaçeyên nû yên hinardekirinê li kêleka deryaçeya sereke ya li başûrê Iraqê kir. Ezîz got ku bi vî şêwazî tora hinardekirinê berfirehtir dibe û derfetên piralî ji bo bazarkirin û veguhastina nefta xam ber bi bazarên cîhanê ve mîsoger dike.
Her wiha di daxuyaniyê de hatiye destnîşankirin ku di civînê de behsa giringiya projeyê û pêdiviyên teknîkî û bicihanîna wan hatiye kirin. Hat diyarkirin ku pêwîste bilez kar were kirin ji bo danîna mekanîzmayên bicihanînê û diyarkirina pêdiviyan, herwiha temamkirina gotûbêjan li gel hevpeymaniya kompanyayên cîhanî (UCC), (TI CAPITAL) û (CHEVRON) ên derbarê veberhênana di bicihanîna vê projeyê de.
Herwiha hate gotin ku proje çêkirina toreke nû ya boriyan di rêya her du xetên (Besre - Hedîse - Fîşxabûr) û (Hedîse - Banyas) de bixwe nav xwe digire; bi armanca pişkdarîkirina di pêşxistina jêrxana veguhastin û hinardekirina nefta xam de, her wiha ji bo bihêzkirina hêza Iraqê di piralîkirina xet û deryaçeyên hinardekirina nefta xwe de.
Deriyê Fîşxabûr
Deriyê sînorî yê Fîşxabûr dikeve xala herî bakur-rojavayê Iraqê û Herêma Kurdistanê, tam li ser sêgoşeya sînorî ya di navbera Iraq, Sûriye û Tirkiyeyê de. Ji aliyê îdarî ve, ev herêm ser bi qezaya Zaxoyê ya li parêzgeha Dihokê ye.
Ev derbenda sînorî bi çend navên cuda tê naskirin û dabeşkirin:
Deriyê Sînorî yê Sêmalka: Beşa ku Iraqê (Herêma Kurdistanê) bi Rojavaya Kurdistanê (Bakur û Rojhilatê Sûriyeyê) ve girêdide, piranî wekî "Sêmalka" tê naskirin. Fîşxabûr gundê li vê deşta sînorî ye û Sêmalka jî navê xala derbasbûnê ye.
Xala Sêgoşeya Sînorî: Ji ber ku çemê Dîcleyê di vê xalê re derbas dibe û sînorê her sê welatan dabeş dike, di qada navneteweyî û pîşeyî de wekî "Sêgoşeya Sînorî ya Fîşxabûrê" jî tê binavkirin.
Ev xal ji bo projeyên aborî û neftê xwedî giringiyeke stratejîk a pir mezine, ji ber ku boriyên neftê yên Iraqê ber bi deryayê ve di vê herêmê re derbas dibin.