هاووڵاتییەکی خەڵکی شارۆچکەی بەردەڕەش لە پارێزگای دهۆک، کە لە ساڵی ٢٠٠٣ـەوە بێسەروشوێن بووە و لە تاران ژیاوە، دوای ٢٣ ساڵ لە تارانەوە کەسوکارەکەی لە بەردەڕەش دەدۆزێتەوە وئەمڕۆ گەشتەوە بەکەسووکارەکەی.
بەپێی زانیارییەکانی پەیامنێری ڕۆژنیوز، قاسم حوسێن، خەڵکی گوندی کانی ئەسپانی مەزنە لە سنووری شرۆچکەی بەردەڕەش، لە ساڵی ٢٠٠٣ و لە تەمەنی ٣٥ ساڵیدا گوندەکەی جێهێشتووە و لەو کاتەوە هەموو پەیوەندییەکی بە خێزانەکەیەوە پچڕاوە، سەرەڕای گەڕان و بەدواداچوونی زۆری کەسوکارەکەی، هیچ سەرەداوێک لەسەر چارەنووسی دەست نەکەوتووە و خێزانەکەی پێشبینی ئەوەیان کردووە گیانی لەدەستدابێت.
پەیامنێری ڕۆژنیوز ئەوەیشی زانیوە، قاسم حوسێن دوای ٢٣ ساڵ لە ڕێگەی تۆڕی کۆمەڵایەتیی ئینستاگرامەوە وێنەی باوک و براکانی لە ئەکاونتی برازایەکی دەبینێت و دەیناسێتەوە، بەمەش دەرگایەکی نوێ بۆ کۆتاییهاتن بە نەهامەتییەکانی چەندین ساڵە دەکرێتەوە.
لەوبارەیەوە، سەمیر عەبدولقادر، برازای قاسم حوسێن، سەبارەت بەم ڕووداوە بە ڕۆژنیوزی ڕاگەیاند، قاسمی مامم چووەتە ناو ئەکاونتی ئینستاگرامەکەم، لەوێ وێنەی باوک و براکانی خۆی بینیوە و هەمووانی ناسیوەتەوە، بۆیە نامەیەکی بۆ ناردووم و تێیدا نووسیویەتی "سڵاوێک دوای زیاتر لە بیست ساڵ بۆ برازاکەم". ئێمە زۆر دڵخۆشین کە ماممان بە زیندوویی دۆزیوەتەوە و چاوەڕوانی گەڕانەوەی دەکەین.
قاسم کە ئێستا تەمەنی ٥٨ ساڵە و لە تاران ژیاوە و کاری کردووە، پاش ئاشکرابوونی چارەنووسەکەی ڕێکارەکانی گرتەبەر، سەرچاوەیەکی ئاگادار لە کەسوکاری ناوبراو بە ڕۆژنیوزی ڕاگەیاند، کەوا ئێستا قاسم گەیشتووەتە کوردستان و بڕیارە ئێوارەی ئەمڕۆ بگاتەوە بە کەسووکارەکەی لە زێدی خۆی.
س. ع