دەستەی دەستپاکی عێراق ڕاگەیەندراوێکی سەبارەت بە هەزاران مووچەخۆر بڵاوکردەوە کە مردوون و هێشتا مووچە وەردەگرن.
بەپێی ڕاگەیەندراوەکەی دەستەکە، لە ئەنجامی وردبینی دۆسییەی خانەنشیناندا، دەرکەوتووە کە مووچەی ١٦ هەزار و ٣٨٤ کەسی مردوو بەردەوام خەرج کراوە، کە دەستبەجێ دوای وردبینییەکە مووچەکانیان بڕدراون.
دەستەکە ئاشکرای کردووە، ٤٠ هەزار کارتی بانکی بە داتای کۆن و ناڕاست کاریان پێکراوە، ئەمەش بۆشاییەکی گەورەی ئەمنی و کارگێڕی دروستکردووە.
ئاماژە بەوەشکراوە لە ئەنبار، ١٩ هەزار و ٣٢١ دۆسیە بەهۆی نەبوونی زانیاریی ڕاست و ورد ڕاگیراون تاوەکو لێکۆڵینەوەیان تێدا دەکرێت.
هەروەها لە پارێزگای نەینەوا، پڕۆسەی وردبینییەکی چڕ بۆ ١٠٢ هەزار و ٨٦٧ ناوی قوربانیانی تیرۆر بەڕێوەدەچێت.
دەستەی دەستپاکی جەختی لەوە کردووەتەوە کە بەشێک لەم کێشانە تەنها هەڵەی کارگێڕی نەبوون، بەڵکو جۆرێک لە گەندەڵی و هەڵەی ئەنقەست لەناو فەرمانگەکاندا پەیڕەو کراوە بە مەبەستی قۆرخکاری یان بەهەدەردانی سامانی گشتی.
لە کۆتاییشدا، دەستەی دەستپاکی عێراق دووپاتیکردووەتەوە، هەڵمەتەکانیان بەردەوام دەبن بۆ بڕینی سەرجەم مووچە نایاساییەکان و گەڕاندنەوەی ئەو پارانەی کە بە هەڵە یان نایاسایی خەرج کراون بۆ خەزێنەی دەوڵەت.
ئـــ.ع